درس عشقی اگر عاشقسن ایله ازبر اوخی
عشق منشورینه باخ مطلبی جان پرور اوخی
.
ایسته سون قلبیوه تابش ایلیه جلوۀ نور
ایده سن روحووی تشجیع دولا مغزیوه شور
ایله تاریخچۀ زمرۀ عشاقه مرور
سرسری گیچمه اولوب رمزینه مستحضر اوخی
.
عشق بیر قوه دی انسانه شهامت گتورر
بیر همایون پر همادور که سعادت گتورر

صفت سلم و رضا صدق و صداقت گتورر

عشقی پس زورق انسانیته لنگر اوخی

.

گاهی عاشق گوروسن عشق ایلیوب ناره گیدر

گاه طوفانه دوشر گه دم منشاره گیدر

گه کسللر باشینی طشته گهی داره گیدر

عشقه هر عاشقی بیر نوعی نمایشگر اوخی

.

چوخدی لبیک دیوب حقه اولان بندۀ عشق

عاشق صادق و خونگرم و برازندۀ عشق

اولدی تکمیل حسین آدینه پروندۀ عشق

سلک عشاقه مبارک آدینی رهبر اوخی

.

ایسته سوک عشقیله عشق نجبادن دانشاق

وصف جانبازی مردان خدادن دانشاق

بیر حسین بیرده گرک کرب و بلادن دانشاق

من دیوم شرحینی سن سینوه یاز بهتر اوخی

.

کربلا عاشق و آزاده لرون مسکنی دور

خاتم العشق حسین ابن علی مدفنی دور

پیرهنسیز بدنون پوشش و پیراهنی دور

نرم توپراقینی دلداده لره بستر اوخی

.

-شعر:بخشی از شعر مرحوم استاد انور اردبیلی در شهادت حضرت علی اصغر علیه السلام